創造宇宙萬物以及世界人類，閣用祢沒盡的疼痛疼惜每一個生命，阮至親愛的上帝：感謝祢對人類歷史開始，就賞賜每一個有祢形象的生命通享受你應允生命的自尊、尊嚴及價值。祢呣那疼痛世間每一個族群，祢亦疼痛阮台灣這個美麗的國家以及佇這個土地生活的2300萬的台灣人民。
雖然4.5百年來，台灣人民受外來政權統治及殖民，致到阮歷代的祖先受到多多凌辱、壓迫及困苦，但是祢的公義及疼痛並沒離開阮，通過多多疼痛台灣、為台灣犧牲奉獻的烈士及先輩，互阮呣那看見亦親身體驗民主的成果。真可惜有真多人住佇台灣，吃台灣米、喝台灣水，卻呣認同台灣是伊的國家。亦因為2000年-2008年台灣政黨輪替由民進黨執政以後，在野黨沒理性、沒公義、沒道德、沒是非的擾亂，互台灣社會充滿多多對立、怨恨、不安及危機。台灣的前途亦因為按呢有閣卡多的艱難、挑戰及阻擋！今年5月20日以後，765萬台灣人民選出的國民黨恢復執政，但是3個多月以來政府施政呣那民生愈困苦，經濟愈沒路，並且漸漸失去台灣的主權。8月30日佇台北市有30萬台灣國主人行佇街路及總統府頭前向國民黨政府大聲要求「護民主、顧民生、要陽光。」阮確信只有通過台灣人民勇敢「制憲救台灣，建國護子孫」台灣才有光明、希望的前途以及公義、和平的未來。
賞賜人類信心、疼心及智慧的上帝，阮佇祢的面前迫切向祢懇求，求祢引導台灣執政的政府官員及政黨，攏有真正疼痛台灣的決心及意志，願意為著台灣成做正常化的民主國家，歡喜忍受各種的犧牲及苦痛。特別呼籲執政的國民黨政府應該盡職打拼，早日互台灣國家加入聯合國，通互台灣2300萬人民成做世界公民；呣是只有通過邦交國提出申請期待「有意義參與聯合國專門機構的活動」，互咱台灣人民繼續做國際孤兒！
賜福全世界人類成做一家人的上帝，阮相信祢佇1945年互全世界國家做伙成立聯合國是欲提醒每一個國家、每一個族群互相尊重，彼此相疼。雖然有沒仝款的種族、語言、膚色、文化、宗教、生活方式及政治制度，但是全世界人類攏仝款期待每時每刻活佇自由、平等、和平及互相尊重的「生命願景」！
真可惜，因為世界歷史的結果、國際政治複雜的現實以及台灣的政府沒盡力打拼，致到台灣成做全世界194個國家唯一呣是聯合國會員的國家，台灣2300萬人民沒法度享受世界公民應有的保障及權利。
充滿憐憫、恩典及疼痛的上帝，阮迫切懇求祢感動閣改變世界各國對台灣的態度，互鋛歡喜肯定、接納台灣國家獨立主權的事實以及民主政治的成果。亦佇沒偌久的將來通過聯合國正常的程序接納台灣國成做聯合國大家庭的一份子。阮確信祢疼痛台灣人民，阮亦相信佇祢至美好的旨意及計劃中，祢必然應允阮的懇求互阮台灣2300萬的生命通及全世界人類共同享受「世界人權宣言」的保障，得著真正的自由及平等！
這是對阮心底深深的期待及盼望，願祢歡喜鑑納閣照祢的旨意來成就，奉靠主耶穌基督的聖名懇求，阿門。
【2008年9月14日下午佇美國華府Wheaton教會「為世界、美國、台灣公義和平祈禱大會」】
