主後2008年10月12日
今年9月20日紀念台灣921大地震9周年的時刻，佇埔里桃米生態村重新啟用1995年阪神大地震神戶鷹取教會的「紙教堂」（Paper Dome）。當時鷹取教會禮拜堂毀壞，但是負責的神田裕神父堅持社區內住民厝宅沒重建之前，絕對沒欲起造新的禮拜堂；後來因為社區需要活動的空間，加上坂茂建築師負責1000萬日幣建築費的前提下才同意起造這間「紙教堂」。「教堂」原來是「沒生命的建築物」，但是通過空間的使用、人的互動、生命的交流，卻欲見證「上帝對生命沒盡的疼痛及關懷」，這是鷹取教會通過「紙教堂」帶來的「生命見證」。這間「紙教堂」2005年9月完成它階段性的任務，佇埔里新故鄉文教基金會廖嘉展董事長的爭取以及努力，克服多多困難，今仔日這間「紙教堂」（由58支紙管，每支長5公尺，直徑33公分，厚1.5公分的紙管組成通容納80個座位橢圓型的空間）佇埔里「再生」，呣那互台灣及日本兩國人民做伙「疼惜生命，分擔苦難」，亦共同見證「生命及心靈重建的盼望及喜樂」；甚至亦是天主教及基督教做伙佇「社區宣教」及「社區關係」的「歷史見證」！
馬太福音22：1-14耶穌所講的「筵席的比喻」佇4福音書的路加14：16-24有相類似的記載，但是因為來自沒仝款的文學傳統，致到有沒仝款的內容。但是當咱比較馬太22：1-14及路加14：16-24，兩種版本有㙉的共同點：赴筵席的邀請，被邀請的人的拒絕，第2次佇街路邀請所有的人來參加筵席，後來筵席的座位攏坐滿。沒論馬太22：1-14或是路加14：16-24，耶穌親自說明「上帝國筵席」的比喻，是閣一遍分享「上帝國」的真理，亦閣一遍提醒咱基督徒的信仰學習及使命。
1. 上帝國的筵席—上帝親自的邀請及鼓勵
馬太22：2-3耶穌用譬喻講：「天國比並人君給伊的子備辦婚姻的筵席，差伊的奴僕，召所請的來赴筵席，若是㙉呣來。」（現代台語譯本：「天國通譬喻做一個國王給他的子辦婚宴，他差奴僕去叫所請的人客來赴婚宴，不過㙉呣來。」）馬太22：4-5國王第2遍閣差其他的奴僕去邀請受邀請的人客，對㙉說明婚宴的筵席已經準備好勢，牛及肥的牛-a-kian已經刣，一切攏準備完成，請㙉來赴婚宴；結果受邀請的人沒看做要緊，作㙉去！
「上帝國的筵席」互咱看著上帝主動、積極的疼痛及救恩，上帝通過種種的方法，一遍閣一遍的邀請及鼓勵，期待咱通成做「上帝國的子民」享受「上帝國的平安及喜樂」！今日對佇「上帝國的邀請」，互我特別想起2方面的信仰課題：(1)上帝邀請及鼓勵咱改變咱的「教會觀」及「宣教觀」，互咱重新檢討及反省「教會」是什麼？教會為什麼存在？(2)上帝邀請咱眾兄姊作伙有份佇「上帝國的服事」，「上帝的筵席」是佇上帝國內面咱共同通過信仰的學習得著平安及喜樂，特別是「盡心盡意的服事」閣卡體驗上帝沒盡的應允及賜福！
2. 上帝國的筵席──咱的選擇、決定及回應：
「上帝國的筵席」國王三番兩次差派奴僕對邀請的對象表達誠意，希望受邀的對象來參加已經準備完成的婚宴。但是受邀請的對象，攏有自己拒絕或是決定沒去參加的理由及原因；最後國王按呢講：「婚姻的筵席已經便，若是所請的𠗟堪得。」（現代台語譯本：「呣過所邀請的人攏沒資格互咱請。」）國王接續講：「所以恁去大路頭，見若所抵著的，攏請㙉來赴筵席。」請㙉奴僕出去路裡，聚集凡所抵著的，無論好歹，婚姻的客廳人客就滿。面對「上帝國的筵席」的邀請，當咱一再拒絕上帝，上帝就將「上帝國的福份」賞賜其它願意接受的人，原來受邀請的對象就沒機會亦沒福氣通享受「上帝國的平安及喜樂」！這是耶穌佇「上帝國的筵席」提醒咱著把握機會閣正確的選擇，才有福氣經驗及體會「上帝國內面的喜樂」！有時上帝邀請咱作伙參與「新的異象及使命」，當咱有沒仝款的考慮及選擇，結果咱亦失去上帝通過新的使命所欲賞賜的應允及賜福！
921大地震以後，咱台灣基督長老教會有25間全倒的教會，總會921重建關懷小組為鼓勵㙉重建教會，一方面補助200萬的重建經費，一方面亦鼓勵㙉沒必要重建永久性的禮拜堂，通考慮以「組合屋式」的禮拜堂，使用一、二十年後才起造新的禮拜堂，按呢卡𠗟造成信徒建堂奉獻的負擔及壓力。咱總會921重建關懷小組邀請全倒教會的牧長代表做伙舉辦2次研討會，甚至邀請神戶鷹取教會的神田裕神父分享㙉怎樣通過「紙教堂」盡力佇社區住民中間見證上帝的疼痛及平安，盼望921全倒的教會通過「紙教堂」的「生命見證」閣卡看著上帝互㙉的使命及異象。2000年12月921社區重建關懷站的牧長及同工亦前往參觀阪神大地震的重建經驗（包括參觀神戶鷹取教會的「紙教堂」）。但是非常可惜閣遺憾，咱台灣基督長老教會921地震全倒的教會，沒一間願意起造「暫時性」的禮拜堂（經費約200萬-300萬新台幣），每一間教會（包括平地及原住民），沒論建築基金有多少，攏決定重新起造「永久性」閣「上好的」禮拜堂通奉獻互上帝，結果每一間重建的教會攏貸款真多，信徒奉獻少（自己家園重建亦需要經費），甚至禮拜堂重建完成，牧師離任或盡程退休，猶原流落多多貸款互信徒繼續承擔！
3. 上帝的筵席──積極的回應及主動的委身：
耶穌所講「上帝國的筵席」，佇馬太22：14耶穌按呢結論：「因為受召的多，受揀的少。」（現代台語譯本：「受呼召的真多，呣久受揀選的真少。」）我相信咱義光教會每一位兄姊，攏是歡喜接受上帝的呼召，閣因為咱積極、主動的委身得到上帝的揀選及賜福！
頂禮拜日咱教會有67位兄姊（包括5名主日學學生）佇師大附中參加今年度星中北2區聯合聖餐禮拜，咱11間教會1200位信徒做伙提醒閣學習：關心至微小的。佇「教會博覽會」有6間教會的分享，我亦友代表咱教會分享義光教會是「佇黑暗中撒下光明」的教會，咱努力及社區成做「生命共同體」，咱教會24小時沒鎖門，咱落實「歸零運動」，咱認真「垃圾分類」，咱「疼痛台灣、關心至微小」。上帝通過義光教會的筵席，邀請、鼓勵咱每一位兄姊做伙參與、積極回應、主動委身，咱就欲看著上帝滿滿的應允及賜福通過咱義光教會分享佇咱社區的好厝邊以及咱台灣國家、社會及全體人民！
盼望咱對「紙教堂」得著學習及提醒，亦祝福咱台灣基督長老教會每一間教會攏親像咱的信仰告白的「教會觀」仝款：「定根佇台灣本地，認同所有的住民，通過疼及受苦來成做盼望的記號。」
