2008年11月2日
馬太福音23章1-12節
感謝上帝帶領咱教會頂禮拜日80位兄姊（包括21位少年團契契友及主日學學生）前往基層福音造橋教會舉行野外禮拜；因為咱的前往及參加，互㙉禮拜堂坐滿滿。特別佇主日禮拜結束後，造橋教會4位信徒分享㙉自己的信仰見證，互我真受感動；上帝通過造橋教會的建立，將上帝國的拯救及生命的盼望帶互這個地區及住民，咱義光教會信徒佇㙉的信仰分享亦共同謙卑學習來得到造就及培養！佇造橋教會互我想起「海角七號」電影內面的佳冬教會，上帝的平安及喜樂通過每一間教會臨到祂所關心及疼惜的生命，亦通過每一遍的敬拜、祈禱及靈修，互咱閣卡經驗上帝沒盡的恩典及賜福！
今早起咱研讀馬太23：1-12是馬太23章全章1-39節耶穌非常嚴格批判法利賽人及經學士記載的第一段落，4本福音書中間只有馬太福音完全保留這段「特殊閣嚴格」的記載！耶穌這種責備的話，是針對當時的經學士及法利賽人，目的是欲提醒㙉，應該建立「真實的信仰」。呣通亦沒應該停留佇「只有信仰的外表及形式，卻沒信仰的內涵及實踐」，因為耶穌認為這種的信仰態度是對上帝的一種侮辱，必須要時刻反省、檢討閣改進！
每年10月31日是全世界教會做伙提醒閣紀念的「宗教改革日」，1517年10月31日路德馬丁針對羅馬天主教的腐敗以及販賣「贖罪券」違反基督信仰的真理，勇敢提出「95條罪狀」，對按呢發起全世界第2次的「宗教改革」！當咱每一遍回顧路德馬丁親像耶穌指責當時墮落的教會及基督徒，將近500年來對宗教改革以後建立的每一個新教的教會（包括咱台灣基督長老教會），就必須謙卑自省、時刻更新及改革，咱才可能成做「上帝盡忠的奴僕」，亦才會建立真正充滿「上帝公義、平安及喜樂的地上上帝國」！
1. 警醒自省，建立真實的基督信仰：
馬太23：3-5耶穌講：「所以見若㙉（經學士及法利賽人）所給恁講的，攏著行來守伊。總是莫得照㙉的所做來行；因為㙉有講，也無行。」（現代台語譯本：「所以，㙉所給恁講的，恁攏著去做，去遵守，不過呣通學㙉的行為，因為㙉會講𠗟做。」）耶穌繼續講：「㙉將人擔沒法的重擔捆互人擔，自己連一隻指頭仔to呣肯振動。㙉所有的行為攏是欲做互人看…」（現代台語譯本）耶穌指責當時的教會當局及宗教領袖（經學士），以及非常嚴格遵守摩西律法自認為真敬虔的基督徒（法利賽人），耶穌講㙉坐佇摩西的位解釋律法，咱著遵守去行；但是咱呣通學㙉的行為，因為㙉會講𠗟做，若是有做嘛是為著欲做互人看！耶穌真沒客氣指出基督信仰非常嚴重的錯誤態度---「形式化的信仰」，只有看重外表及形式，卻沒真正改變的生命及見證。甚至常常指責、批評、要求別人信仰的課題及重擔，但是自己卻沒自我要求及學習，佇別人的艱苦及困難的時，連一隻指頭仔的關心及行動攏呣願意付出及學習！這種「錯誤的信仰態度」對初代教會及每一個時代的教會帶來非常大的傷害及影響，所以耶穌痛心指責批判，期待每一位跟隨祂的人攏必然一定決志--「警醒自省，建立真實的基督信仰」！
當咱繼續看馬太23：13-36，耶穌重複連續6遍（13、15、23、25、27、29節）責備講：「恁假好的經學士及法利賽人，有災禍啊！」（現代台語譯本：「假好的經學教師及法利賽人，恁慘啊！」），甚至佇35節耶穌講：「按呢，恁佇地上刣死義人的血債攏歸佇恁身上；……。」耶穌深知假好閣沒真實的信仰怎樣造成上帝國的損傷及負面的影響，所以他切切提醒、警告咱絕對呣通建立錯誤、沒正確、沒真實的基督信仰！
2. 信靠上帝，謙卑得福：
馬太23：11-12耶穌結論講：「若是恁中間做大的，欲做恁的差用。若自高的，欲互伊卑微；家己卑微的，欲高升伊。」（現代台語譯本：「恁中間上大的著做恁的差用。自高的會受降低，自謙的會受高升」）（紅皮漢羅：恁中間第一偉大的著做恁的僕人。自高的人一定會受壓低，自謙的人一定會受提高。）當咱讀著這段記載，咱真自然就會想起耶穌佇最後晚餐為學生洗腳的信仰典範，約翰13：14-15耶穌為學生洗腳以後對學生講：「我做主，做先生，尚且給恁洗腳，恁亦著相共洗腳。因為我已經用模樣互恁，互恁照我所對恁行的來行。」（現代台語譯本：「我做主，做老師，to給恁洗腳，恁嘛著互相洗腳。我有留模樣互恁，是欲互恁通照我對恁所做的去做。」咱看見耶穌呣那佇口頭上提醒、勉勵佇基督信仰內面，欲做大、欲做頭、欲做領袖的，著應該代先成做眾人的差用，著自己謙卑服事別人，著親像耶穌基督積極關心生命，這是「基督信仰的逆理」卻真正是「上帝國寶貴的真理」！這就是基督信仰的特色及本質，亦是基督信仰及世界其他所有宗教信仰最大的沒仝款。
回顧2000年來的教會歷史，甚至包括舊約時代以色列人耶和華宗教的時期，咱清楚看見佇基督宗教制度及組織內面，免不了佇人性軟弱中間，產生真多宗教的「特權者」。㙉對宗教信仰錯誤的引用、解釋及要求，對基督信仰的宣教以及上帝國救恩的分享造成非常大的傷害及影響。這就是為什麼路德馬丁佇1517年10月31日發起「宗教改革」的原因，路德馬丁確信真正的基督信仰呣是他所看到的教會現況，「上帝的救恩」閣卡呣是用金錢買贖罪券就通得著！路德馬丁相信「聖經絕對的權威」所啟示「上帝的救恩」是「因信稱義」就通體驗閣得著；所以「萬民攏通成做祭司」！
馬太23：7-10耶穌提醒基督徒呣通互人稱做「拉比」、「父」、「先生」（現代台語譯本：「拉比」、「老父」、「教師」），因為耶穌期待咱攏通成做「信靠上帝、謙卑得福」的「基督門徒」！佇咱長老教會或是改革宗、歸正教會的教會體制中，雖然有「牧師」、「長老」、「執事」等教會職稱，但是這呣是強調㙉有什麼特權，顛倒是提醒㙉怎樣佇這些職份學習實踐「上帝盡忠的差用」，亦成做眾信徒「基督信仰的典範」。
今日咱兄姊閣一遍做伙學習「宗教改革」的精神，雖然咱時常信心軟弱，但是咱歡喜重新決志，每時每刻信靠上帝，信仰更新，謙卑得福！期待咱的一生親像馬可10：45仝款跟隨耶穌基督：「因為人子呣是來欲互人服事，反轉是欲ka人服事，甚至犧牲自己的生命來贖回真多人。」
